时间：2021-08-27 来源：龙川档案馆藏书
阿哥相貌唔端方，
唔敢恋你斯文娘,
涯今好比麻布样，
唔敢落你绸缎箱。
唔到十五月唔光，
唔到夏至禾唔黄，
妹子还系年纪小，
唔敢同哥说短长。
阿妹门前花未开，
阿哥唔好紧缠来，
等多几年花开日，
阿哥有情再来采。
郎想同妹结鸳鸯，
难过牵牛把树上，
你想同妹结成对，
唔当上天摘月亮。
翠鸟飞来着绿衫，
害涯鲤鱼着下惊，
个人姻缘各人份，
你莫尽命古落潭。
七两八两有一斤，
唔敢压你大花星，
阿哥生得相貌丑，
唔敢恋你斯文人。
日头一出乌云遮，
唔敢恋你有钱侪，
黄蜂飞进花园里，
唔敢采你牡丹花。
妹子有情涯也知，
可惜阿哥已有妻，
俩人虽好莫邪念，
免至日后激到你。
墙内栽花墙外开，
墙矮花高现出来，
妹今好比红花样，
蝶多花少分唔开。
一杯滚水泡茶杯，
来得人多端奈侪，
天平厘秤涯晓使，
大秤上钩挽奈侪。
桃花开哩李华开，
阿哥心里爱想开，
村村都有斯文妹，
你系有心寻过来。
你系唔肯唔甲硬，
侪家今下都年轻。
两家甘愿才长久，
强扭西瓜味唔甜。