有心唔怕隔岭岗,

有情唔怕路头长;

  有情唔怕人阻隔，

   只怕涯俩变心肠。

  隆街行上系软坑，

手挽郎手妹唔惊;

  男婚女嫁正经事，

  阎王也爱放路行。

  上也难来下也难，

好比鲤鱼上急滩;

  上水就怕鸳鸯劫，

  下水又怕网来拦。

  两条丝线长又长，

打个结头丢过墚;

千年相见结唔散,

 万年情义唔丢郎。

  哥妹同裁一片林，

哥系村中一株榕;

  榕树根深藤缠树，

  妹子缠哥一世人。

  交条人情就系难，

断条人情一阵烟;

  甜酒爱酸就容易，

  酸酒变甜就艰难。

 送妹一对花手巾，

朝朝洗脸俩相吻;

 一年三百六十日，

 夜夜洗身俩相亲。

 送妹一对花手巾，

朝洗脸来夜洗身;

  年年月月身相伴，

  时时刻刻爱在心。

 一个白鹤飞天庭，

飞来飞去唔知林;

  一根花针跌落海 ，

  阿哥有妹正难寻。

  九月过哩十月朝，

霜打禾苗夜夜燥;

  雀仔有双喳喳叫，

  阿哥有妹正心焦。

  脚软难上这条岗，

后生右妻家难当;

 衫烂裤烂有人补，

  灶头锅尾有人帮。

  妹在树下笑眯眯，

歌送妹子甜蜜桃;

 食哥蜜桃领哥情，

 借哥衫角擦净毛。

  东山日出放光华，

时时想念妹子家;

 三餐食饭一想起，

 有鱼有肉溜溜下。

  隔远看到妹子来，

害涯心头乐开怀;

 行前看看唔系妹，

  千斤石板压上来。

  阿妹上山割草皮，

割出黄蜂叮眼眉;

  眼眉肿痛有要紧，

  就怕阿哥诈唔知。

   远看对面有个人，

日头晒眼看唔真;

  行前一看涯靓妹，

  正系情哥意中人。

  门外种竹竹叶飞，

唔得转身贴叶尾;

  涯今隔哥天柬远，

  年头嬲哩到年尾。

  春夏秋冬又一年，

阿妹心思似云烟;

 妹同情哥同生死，

  就怕阿哥情唔领。

山凤为何唔飞翔?

山花为何唔发香?

山妹为何泪汪汪?

山妹为何唔歌唱?

  山凤右凰唔飞翔，

山花右雨唔发香;

  山妹有哥泪汪汪，

  山妹苦闷唔歌唱。

  百花争春梅最先，

哥妹同村又同年;

 哥家勤俭虽唔富，

 妹嫁情哥唔为钱。