时间：2020-12-23 来源：
男：龙川系个好地方，广场文化摆歌场；
自古山乡多歌手，唱个山歌找对象。
女：唱个山歌找对象，捱话亚哥半颠狂；
山歌唱得亚妹到，做饼唔用放白糖。
男：做饼唔用放白糖，亚妹讲话唔正常；
捱唱山歌找对手，唔系找妹结鸳鸯。
女：唔系找妹结鸳鸯，亚妹唔怕山歌王；
亚哥有问妹有答，饭汤洗衫有得浆。
男：饭汤洗衫有得浆，涯话亚妹莫逞强；
唱有两首你有答，黄泥搪壁有面光。
女：黄泥搪壁有面光，捱有瓷片贴新墙；
如果亚妹唱唔赢，捱就嫁你做新娘。
男：来捱屋下做新娘，看你装扮得人狂；
头戴红花着绸缎，好像街上花姑娘。
女：好像街上花姑娘，开放改革大变样；
住既新屋着绸缎，如今世界系平常。
男：如今世界系平常，问你当家样般当?
家官家婆切唔切，待人接客要内行。